鎌倉豆菓子手信推薦｜鎌倉まめや逾60種口味＋4間分店懶人包

行去鎌倉，由 JR 鎌倉站一路行入小町通り，沿途食買玩樣樣齊。當中有一個豆菓子品牌「鎌倉まめや（Kamakura MAMEYA）」特別受遊客歡迎，逾 60 種口味由鹹香到甘甜一應俱全，仲可以試食先買，慢慢揀啱口味先入手，係鎌倉一帶數一數二啱買嘅手信。

逾60種口味、試食先買：鎌倉まめや的豆菓子

鎌倉まめや（Kamakura MAMEYA）以大豆、蠶豆、花生、合桃等豆果做材料，交由專業菓子職人依傳統製法慢慢炮製，做出一系列健康又惹味嘅豆菓子。品牌主打逾 60 種口味，由經典抹茶、梅乾，到濃厚蝦味、魷魚、咖喱、山葵等較特別嘅款式都搵得到。最貼心嘅係店內大部分款式都可以試食先買，啱口味先入袋，唔使靠估，所以好多遊客都會喺呢度一次過掃齊送禮自用。

以下整理咗鎌倉まめや幾款人氣口味，由暢銷經典到創新款都有，可作入手參考：

口味	日文原名	特色
抹茶豆	Matcha-Mame	暢銷款，帶抹茶優雅微苦與茶香
梅豆	Ume-Mame	梅乾風味，十足和風滋味
濃厚蝦豆	Rich Ebi-Mame	香脆口感、濃郁蝦香
魷魚花生	Ika-P	魷魚碎帶出花生風味
美味醬油豆	Umakichi Shoyu-Mame	醬油風味、灑上海苔
黃豆粉豆	Kinako-Mame	大豆裹黃豆粉，健康滋味
蛋黃醬花生	Mayonnaise-P	花生與蛋黃醬意外夾
咖喱蠶豆	Soramame Curry	厚裹咖喱粉嘅蠶豆
青海苔山葵花生	Aosa Wasabi-P	山葵風味軟花生裹青海苔

鎌倉まめや 4 間分店一覽

鎌倉まめや喺鎌倉、大船一帶設有 4 間分店，無論你係行長谷一帶睇大佛、行小町通り掃街，定係喺鎌倉站／大船站轉車，都可以順路入貨。以下逐間列出地址、營業時間同交通：

1. 長谷本店（Hase Main Shop）

位於長谷一帶嘅本店，行去睇鎌倉大佛、長谷寺嘅途中順路就到，係四間分店入面最具代表性嘅一間。江之電長谷站落車行約 1 分鐘即達，行程鬆動，買完手信可以繼續長谷散策。

2. 小町通り店（Komachi-dori Shop）

開喺鎌倉最熱鬧嘅小町通り商店街，由 JR 鎌倉站東口行約 5 分鐘就到，係邊行邊食邊買嘅好位置。週末同假日營業時間延長至 18:00，遲少少嚟都仲趕得切試食揀手信。

3. CIAL鎌倉店（CIAL Kamakura Shop）

設喺 JR 鎌倉站旁嘅站樓商場 CIAL 1 樓，營業時間由朝早 9:00 到夜晚 8:00，係四間入面開門最早、收得最夜嘅一間。趕住搭車離開鎌倉前，喺呢度補貨最就腳。

4. 大船ルミネウィング店（Ofuna Lumine Wing Shop）

位於大船站南口前 LUMINE WING 商場 3 樓，營業到夜晚 8:30。大船係前往鎌倉、湘南一帶嘅轉乘大站，順路喺站前商場買返一兩包豆菓子，啱晒臨走前最後衝刺。

分店實用資訊

分店	營業時間	交通
長谷本店	10:00-17:00	江之電長谷站步行約1分鐘
小町通り店	10:00-17:00（六日及假日至18:00）	JR鎌倉站東口步行約5分鐘
CIAL鎌倉店	9:00-20:00	JR鎌倉站東口（CIAL 1F）
大船ルミネウィング店	10:00-20:30	JR大船站南口前（3F）

常見問題

鎌倉まめや有幾多種口味？可以試食嗎？

鎌倉まめや主打逾 60 種口味，由大豆、蠶豆、花生、合桃等豆果製成。店內大部分款式都可以試食先買，啱口味先入手。

鎌倉まめや有邊幾間分店？

共有 4 間分店：長谷本店、小町通り店、CIAL鎌倉店，以及大船ルミネウィング店，分佈喺鎌倉與大船一帶。

鎌倉まめや邊款豆菓子最人氣？

抹茶豆（Matcha-Mame）係品牌嘅暢銷款，帶有抹茶嘅優雅微苦與茶香；其他人氣口味仲有梅豆、濃厚蝦豆、咖喱蠶豆等。

鎌倉まめや可以退稅（免稅）嗎？

鎌倉まめや不設免稅。